[ chhatrapati shivaji maharaj marathi shayari ]
मुलाच्या बारशाला एवढे वादळ कसे सुटले
मुलाचे नाव त्यांनी ठेवले शिवराय आहे का
- संतोष
कुणाला पुण्य आठवते कुणाला स्वर्ग आठवतो
कुठे देऊळ दिसल्यावर मला शिवबाच आठवतो
- अभिजीत काळे
प्रतिमा पूजन करण्यापेक्षा विचारातुनी रुजवू शिवबा
अशाप्रकारे शिवरायांना अभिमानाने देवू मुजरा
©सौ. हेमलता पाटील
कशाला वाट मी पाहू कधी परतेल तो शिवबा
मला मी मागते आता पुन्हा जन्मच जिजाईचा
©ज्योत्स्ना राजपूत
मातीसाठी कधीही अव्वल
शर्थ माझ्या जिवाची व्हावी
बघावे मी परस्त्रीस जेंव्हा
नजर माझी शिवाजी व्हावी
© लतीफ शेख
अब्रूवरी कुणाच्या का हात घालता
शिवबा जिवंत आहे डोक्यात पाहिजे
©मनोज सोनोने
दुःख अमुचे दूर करण्या इश्वरा इतुकेच कर
थोर शिवबा सारखा पाठव पुन्हा बंदा इथे
©मसूद पटेल
इतिहास काल घडले आई तुझ्या दुधाने
शिवबा इथेच बनले आई तुझ्या दुधाने
© निलेश कवडे
| status marathi shayari on shivaji maharaj|
सच्चा शिवबा एकच आहे, हजार कशाला करता ?
कानटोपरे फाडून त्याची, विजार कशाला करता ?
©नितीन देशमुख
शत्रूसमोर तुमची झाली न हार शिवबा
झुंजार मावळ्यांचा तू कर्णधार शिवबा
जिंकून तू दिले हे हाती स्वराज्य अमुच्या
या हिंदवी भुमीचा तू शिल्पकार शिवबा
©प्रकाश मोरे
लाख लढाया लढवत होता वीर शिवाजी
मृत्यूलाही चिडवत होता वीर शिवाजी
.
प्रेरित करण्या भरकटलेल्या मरह्ट्ट्याला
इतिहासाला घडवत होता वीर शिवाजी
©प्रशांत पोरे
वागतो दुःखातही योद्ध्याप्रमाणे
शूर शिवबा राहतो हृदयात माझ्या
© राजीव मासरूळकर.
कोणत्या शब्दात मांडू हे कळेना
श्वास राजे ध्यास राजे काळजाचे..
Radhika Prem Sanskar
लाखात पाहिला मी शिस्तीतला शिवाजी
फेकून मौन मारी संतापला शिवाजी
©रविप्रकाश चापके
जुल्माला कापणारी तळपती तलवार शिवबा
होता रयतेचा दाता अन् खरा आधार शिवबा
© शेख बिस्मिल्ला सोनोशी
जन्मास येत आहे शिवबा जणू नव्याने
गर्भास देत जाती संस्कार पुस्तके ही
© शशिकला बनकर
तळपली आमच्यासाठी तुझी तलवार शिवराया
जणू तू पेरला आहे मनी अंगार शिवराया
.
असे वाटे पुन्हा यावे नवा तू जन्म घेऊनी
नव्याने दूर व्हावा येथला अंधार शिवराया
©शेखर गिरी
असतील शौर्यगाथा तुमच्या पराक्रमाच्या
चारित्र्य मात्र तुमचे शिवबासमान नाही
©शरद धनगर
घडवायचाच असेल शिवबा पुन्हा इथे जर,
विसरु नकोस कधी जिजाई कर्तव्य तुझे
©अरुतनया
आई तुझ्या मुलाला कोळून पाज शिवबा
त्याला दिसेल परक्या स्त्रीच्या रुपात आई
©आत्तम गेंदे
अंधारावर मात शिवाजी
एक नवी सुरवात शिवाजी
असाल जेथे दिसेल माझा
या साऱ्या विश्वात शिवाजी
©चंदना सोमाणी
आज का तू शोधतो येथे शिवाजी ?
जन्मतो तो एकदा हा दस्त आहे
©ॲड. छाया गोवारी
श्वासात शिवबा,ध्यासात शिवबा
हृदयातल्या विश्वासात शिवबा
पाहून त्याची विज्ञानदृष्टी
तो आज असता, 'नासा'त शिवबा
('NASA')
©गोपाल मापारी
अभिमानाने सांगत असते बाई आहे
युगकर्त्या त्या शिवबाची मी आई आहे
©डॉ सुनंदा_शेळके
हे गगन चुंबीती, सह्याद्रीचे कडे
स्वराज्यप्रभू शिवराय जणू ते खडे
© सूरज उतेकर
हे सह्याद्रीचे अंगी भिनले वारे,
शिवबा कारणे उभे मावळे सारे
© सूरज उतेकर
नवनवीन माहितीसाठी खालील वेबसाईटला भेट दया
0 टिप्पण्या