Marathi shayari On Holi | festival marathi shayari with images| holi wishes | holi quotes |

    [ Marathi shayari On Holi ]

 | Marathi shayari On Holi |

-----------------------------------------------------------

आज होळीला कशाला हिंडशी बेकार पांडू?

जो तुला भेटेल नेता,त्यास जोडे मार पांडू

आजची न्यारीच होळी ! पाज तू साहित्यिकांना

तेवढा नाहीस का तू काय 'दर्जेदार' पांडू?

ही महागाई अशी अन् ही कशी होळी कळेना,

बोंबले हा देश सारा,बोंब तूही मार पांडू...

सुरेश_भट

-----------------------------------------------------------

अंग अंग चिंब रंग खेळलो असा गडे 

की स्मरेल हीच रंगपंचमी क्षणोक्षणी

©अमित वाघ

-----------------------------------------------------------

आयुष्याची होळी करतो

नंतर गरीब दिवाळी करतो

©अरविंद उन्हाळे

-----------------------------------------------------------

पेटली ह्रदयात होळी आजही

घेरुनी आली उदासी आजही

©अनंत ढवळे

-----------------------------------------------------------

गरीबाच्या लग्नाला नवरी गोरी काय, काळी काय,

महागाईने पिचलेल्याला होळी काय, दिवाळी काय

©ए.के.शेख.

-----------------------------------------------------------

तुझी बनून राहता तुझाच रंग लागला,

अजून आणखी कशास रंग पाहिजे मला

©अन्वी आठलेकर

-----------------------------------------------------------

पोटासाठी आयुष्याची झोळी होते

कधीकधी तर अब्रूचीही होळी होते

©आनंद पेंढारकर

-----------------------------------------------------------

येऊ नये कधीही शिमगा तुझ्या घरावर

मी त्या मुळेच केली होळी जुन्या स्मृतीची.

©आत्माराम जाधव

-----------------------------------------------------------

ती भेटलीच नाही ,होळी तशीच गेली

मज हळद काल ओली, लाऊन मात्र गेली 

©अरविंद पोहरकर

-----------------------------------------------------------

ती पेटवून होळी जाळून या मनाला 

मी आर्तता मनाची रंगात बुडवलेली 

©अलका देशमुख

-----------------------------------------------------------

भरवसा कोठे तसाही कोणत्या विस्तवाचा

तशी होळी की दिवाळी सांगता येत नाही.

©बाळ पाटील

-----------------------------------------------------------

निळसर डोळे,लाल ओठ अन गाल गुलाबी 

तिला वेगळी रंगपंचमी हवी कशाला 

© गोविंद नाईक

-----------------------------------------------------------

रंगात एका रंगुनी जाऊ चला 

ही जात धर्मांची इथे धुळवड नको

©हेमलता पाटील

-----------------------------------------------------------

रोज उत्सव नसे,रोज शिमगा नसे

तू अशी रोज रंगात येऊ नये

©कलीम खान

-----------------------------------------------------------

एका एका स्वप्नांची मी मोळी केली 

पोटासाठी त्या सगळ्यांची होळी केली .

भेद अजुनही वर्णाचा मिटलेला नाही 

रंगपंचमी,धुळवड केली होळी केली

©विशाल राजगुरू

-----------------------------------------------------------

पहा ऐकले मी जनाचे परंतू, मनाच्याच रंगात मी रंगले

तरी जाहली वाटते का मनाची नव्याने पुन्हा आज धुळवड किती

©Prajakta Gokhale -

-----------------------------------------------------------

आठवांचा दिवसभर शिमगा असे

रोज दु:खांची असे कोजागिरी

©रणजीत पराडकर

-----------------------------------------------------------

पेटली होळी सुखाची

आत अंधारून आले.

©रत्नमाला शिंदे.

-----------------------------------------------------------

येते तशीच जाते होळी असो दिवाळी

आता इथे सणांची उरली कुठे नवाई ?

©रुपेश देशमुख

-----------------------------------------------------------

घराची जाहली आहेच होळी मागच्या साली 

तरीही रंग होळीचे पुन्हा खेळायचे आहे

©राधिका

-----------------------------------------------------------

रंगपंचमी जवळी येता जखमेवरची खपली निघते

जुन्या नकोशा आठवणींची ह्रदयामध्ये होळी जळते

©सुनंदा पाटील

-----------------------------------------------------------

नको झालाय शिमगा नेहमीचा

तुझ्या सोबत सणाची हौस फिटली

©स्वप्निल शेवडे

-----------------------------------------------------------

दुःख चिंता प्रेम मत्सर यासवे लढतोस तू

रंगुनी रंगात साऱ्या कोरडा उरतोस तू

© सुप्रिया मिलिंद जाधव

-----------------------------------------------------------

कुणाची आर्त किंकाळी? कसा आवाज हा आला?

कशी ही पेटली होळी? नभाला झोंबती ज्वाला.

© श्रीकृष्ण नारायण राऊत

-----------------------------------------------------------

जे धर्माचा शिमगा करती,

त्या बैलांचा पोळा झाला

©डॉ. संतोष कुलकर्णी

-----------------------------------------------------------

कोणत्या रंगास नाकारू अता मी ?

जीवना भलती तुझी रंगीत होळी

©संजय गोरडे

-----------------------------------------------------------

बोंब असते नेहमीची, 'श्रावणा'च्या दुष्मनांची

खेळती घाणीत होळी, मग धुलीवंदन कशाला

@ 'श्रावण'( शंकर पाटील )

-----------------------------------------------------------

कैफाचा जल्लोष म्हणू की उत्सव होता प्रेमाचा 

रंगपंचमी तारुण्याची, तुला न चुकली मला न चुकली 

@उज्वला मुडप्पू

-----------------------------------------------------------

होळीत रंगला ना माझ्यासवे कधी तू

करशील जी दिवाळी अपुल्याच अंगणी कर

©विजय उतेकर.

-----------------------------------------------------------

झाडांमुळेच टिकून इथला निसर्ग आहे

झाडे तोडुन आपण दसरा होळी केली 

©विनायक पाटील

-----------------------------------------------------------

परस्परांच्या नावाने कायमचा शिमगा

ही स्पर्धेची खाज कशी जिरवावी सांगा ?

© विश्वास कुलकर्णी

-----------------------------------------------------------

रंग माझा वेगळा झाला गुलाबी

मी तुझ्या रंगात न्हाली छान झाले

©वैश

-----------------------------------------------------------